სიახლეები

მჩთ თერაპიის განყოფილების გახსნა ზესტაფონში 2016-05-28 08:38:02

2016 წლის 28 მაისს, 14:00-ზე ზესტაფონის რაიონში "ფსიქიკური ჯანმრთელობის და ნარკომანიის პრევენციის ცენტრის"ხელმძღვანელობით მეთადონით ჩანაცვლებითი თერაპიის განყოფილება გაიხსნა. გახსნას დაესწრნენ "ფსიქიკური ჯანმრთელობის და ნარკომანიის პრევენციის ცენტრის" გენერალური დირექტორი ლაშა კილაძე, დირექორის მოადგილე ხათუნა თოდაძე და ზესტაფონის რაიონის გამგებელი ტარიელ თუთარაშვილი.
ზესტაფონის რაიონში მეთადონით ჩანაცვლებითი თერაპიის განყოფილება ბენეფიციარებს შესაბამის მომსახურებას ორშაბათიდან გაუწევს.

 

ტრენინგი თემაზე: "ნარკომანიის პრევენცია და მკურნალობა"_მეორე შეხვედრა 2016-04-07 08:31:07

2016 წლის 4-7 აპრილს გერმანიაში, ქ. ბერლინში გაიმართა მეორე რაუნდი ტრენინგისა თემაზე: „ნარკოტიკების პრევენცია და მკურნალობა“ პროფესიონალებისთვის ქ.თბილისიდან და ქ. სოხუმიდან. "ფსიქიკური ჯანმრთელობის და ნარკომანიის პრევენციის ცენტრიდან" აღნიშნულ სესიას ესწრებოდნენ ცენტრის გენერალური დირექტორი ლაშა კილაძე და თანამშრომლები- ხათუნა თოდაძე და გვანცა ფირალიშვილი. ტრენინგი ორგანიზებული იყო ევროსაბჭოს მიერ „Confidence Building Measures” პროგრამის ფარგლებში. შეხვედრას წარმართავდნენ ევროსაბჭოს და პომპიდუს ჯგუფის წარმომადგენლები- მირცია მურგია და თომას კატაუ.
ტრენინგი მოიცავდა როგორც თეორიულ მასალას, ასევე პრაქტიკულ მეცადინეობებსა და საიტ-ვიზიტებს. ჯგუფი გაეცნო ქ.ბერლინში არსებულ ნარკოვითარებას, ნარკოპოლიტიკას, პრევენციულ და მკურნალობის მეთოდებს, მათ შორის- თვითდახმარების ჯგუფების მუშაობის პრინციპებს, სოცმუშაკების აუთრიჩ მუშაობას, ინტერნეტზე დაფუძნებულ კონსულტაციებისა და მხარდაჭერის მეთოდებს; მოინახულა პრევენციული და საკონსულტაციო ცენტრები, საკონტაქტო კაფეები, საერთაშორისო სარეაბილიტაციო თვითდახმარების თერაპიული ცენტრი „Synanon“, თერაპიული კომუნა ნარკოდამოკიდებული მიგრანტებისთვის „ADV-NOKTA gGmbH“ და სხვ.
საიტ-ვიზიტების შესახებ მოხსენებები გააკეთეს ჯგუფის წევრებმა.
ტრენინგის ბოლოს გაიმართა დისკუსია და მუშაობა შეფასდა ჯგუფის წევრების მიერ. დაისახა სამომავლოდ გეგმები შემდგომი შეხვედრის ამოცანებისა და მიზნების შესახებ. ჯგუფის წევრებს SWOT- ანალიზის შემუშავება დაევალათ. 

ღია კარის დღე ჟურნალისტებისათვის 2016-03-31 12:31:40

2016 წლის 31 მარტს "ფსიქიკური ჯანმრთელობის და ნარკომანიის პრევენციის ცენტრში" გაიმართა ღია კარის დღე ჟურნალისტებისათვის , ფსიქიკური ჯანმრთელობის საკითხების სწორად გაშუქებაზე. ჟურნალისტებს არესებითი გავლენა აქვთ ფსიქიკური ჯანმრთელობის საკითხების მიმართ საზოგადოების დამოკიდებულებაზე. ყოველდღიურად ახალი ამბების რედაქციაში აქცენტი კეთდება „ცხელ“ ახალ ამბებსა და კრიზისებზე, რასაც შეუძლია საზოგადოებას არასათანადო წარმოდგენა შეუქმნას იმ ადამიანებზე , რომელთაც ფსიქიკური ავადმყოფობა აქვთ, რაც თავის მხრივ დისკრიმინაციას იწვევს. ტრენინგი მიზნად ისახავდა რეკომენდაციებს ჟურნალისტებისთვის ,რაც დაეხმარება მედიას ფსიქიკური დაავადებების უფრო ზუსტი სურათის წარმოჩენაში.

მემორანდუმის გაფორმება საქართველოს ფიზიკური აღზრდისა და სპორტის სახელმწიფო სასწავლო უნივერსიტეტთან 2016-03-16 12:23:19

2016 წლის 16 მარტს, საქართველოს ფიზიკური აღზრდისა და სპორტის სახელმწიფო სასწავლო უნივერსიტეტში, უნივერსიტეტის რექტორმა, პროფესორმა ჯემალ ძაგანიამ და „ფსიქიკური ჯანმრთელობისა და ნარკომანიის პრევენციის ცენტრის“ გენერალურმა დირექტორმა ლაშა კილაძემ ხელი მოაწერეს მემორანდუმს ურთიერთთანამშრომლობის შესახებ.
ხელმოწერის აქტს ესწრებოდნენ საქართველოს სპორტისა და ახალგაზრდობის საქმეთა სამინისტროს სპორტის პოლიტიკისა და მართვის დეპარტამენტის უფროსი ირაკლი დოლაბერიძე და პროფესორები: დავით ზურაბიშვილი, მანანა მნათობიშვილი, ტრისტან გულბიანი , გიორგი ფარულავა , ასოცირებული პროფესორები: მურად გარუჩავა, ირაკლი ჩაგანავა და ქეთევან ბერიძე. მემორანდუმი გულისხმობს ერთობლივი სამეცნიერო კვლევებისა და საგანმანათლებლო პროგრამების განხორციელებას , სამეცნიერო პრაქტიკული კონფერენციების ჩატარებას, ერთმანეთის ბაზებზე სხვადასხვა სახის ღონისძიებების გამართვას.

ღია კარის დღე თემაზე -"ამფეტამინის ტიპის სტიმულატორებზე დამოკიდებულება" 2016-02-17 12:16:41

2016 წლის 17 თებერვალს , ფსიქიკური ჯანმრთელობის და ნარკომანიის პრევენციის ცენტრში ჩატარდა ღია კარის დღე თემაზე -"ამფეტამინის ტიპის სტიმულატორებზე დამოკიდებულება". შეხვედრას ესწრებოდნენ თბილისის სახელმწიფო სამედიცინო უნივერსიტეტის და ივანე ჯავახიშვილის სახელობის თბილისის სახელმწიფო უნივერსიტეტის სტუდენტები, ასევე დაწესებულების თანამშრომლები . მოხსენება მოცემულ თემაზე წაიკითხა ცენტრის ექიმმა-ნარკოლოგმა მარიამ ხოტენაშვილმა. ღონისძიება დასრულდა აღნიშნულ თემაზე ღია დისკუსიით.

ტრენინგი თემაზე "ფსიქიკური აშლილობის მქონე პირთა უფლებები და სამედიცინო ეთიკის საკითხები" 2016-01-31 12:15:23

2016 წლის 31 იანვარს დასრულდა კასკადური ტრენინგი თემაზე "ფსიქიკური აშლილობის მქონე პირთა უფლებები და სამედიცინო ეთიკის საკითხები", რომელიც დაიწყო ევროპის საბჭომ საქართველოს ფსიქიატრიულ დაწესებულებათა თანამშრომლებისთვის. ტრენინგი „ფსიქიკური ჯანმრთელობის და ნარკომანიის პრევენციის ცენტრის“ ბაზაზე განხორციელდა. ვუმასპინძლეთ 200 კოლეგას, გადამზადდა ჩვენი დაწესებულების 58 თანამშრომელი აქედან 16 ექიმი, 14 ექთანი, 24 ექთნის დამხმარე და 4 სოციალური მუშაკი.
ტრენინგი ევროპის საბჭოსა და ევროკავშირის ერთობლივი პროგრამის-"ადამიანის უფლებები ციხეებსა და დახურული ტიპის სხვა დაწესებულებებში"-ფარგლებში ტარდებოდა და მიზნად ისახავდა ფსიქიატრიულ დაწესებულებებში ადამიანის უფლებათა დაცვის გაძლიერებას.
ფსიქიატრიულ დაწესებულებათა თანამშრომლებმა ცოდნა გაიღრმავეს ეთიკის სტანდარტებსა და ფსიქიკური აშლილობის მქონე პირთა უფლებებში.ტრენინგის მოდული პრაქტიკული და თეორიული ნაწილებისგან შედგებოდა. იგი შეიმუშავეს ევროპის საბჭოს საერთაშორისო ექსპერტებმა. ტრენინგებს ქართველი ტრენერები-ფსიქიატრიულ დაწესებულებათა, სახალხო დამცველის ოფისის, შინაგან საქმეთა და სასჯელაღსრულების სამინისტროებისა და სასჯელაღსრულებისა და პრობაციის სასწავლო ცენტრის თანამშრომლები ატარებდნენ, რომლებიც სპეციალურად ამ ტრენინგებისთვის მომზადნენ.

გამოფენა - გაყიდვა 2015-12-29 12:13:56

2015 წლის 29 დეკემბერს, 14:00-ზე , "ფსიქიკური ჯანმრთელობის და ნარკომანიის პრევენციის ცენტრში"ამავე ცენტრის პაციენტების მიერ საახალწლო თემაზე შექმნილი ნამუშევრების გამოფენა-გაყიდვა გაიმართა. აქციის მიზანი იყო, ამ ადამიანების შრომითი უფლებრივი მდგომარეობის გაუმჯობესება, აქტიური ნაბიჯების გადადგმა დასაქმების კუთხით და ინტეგრაცია საზოგადოებაში.

ღია კარის დღე თემაზე - „ფსიქოსოციალური რეაბილიტაცია გუშინ, დღეს, ხვალ.“ 2015-11-27 12:11:45

2015 წლის 27 ნოემბერს, „ფსიქიკური ჯანმრთელობის და ნარკომანიის პრევენციის ცენტრში“ ჩატარდა ღია კარის დღე თემაზე - „ფსიქოსოციალური რეაბილიტაცია გუშინ, დღეს, ხვალ.“ შეხვედრას ესწრებოდნენ თბილისის სახელმწიფო სამედიცინო უნივერსიტეტის და ივანე ჯავახიშვილის სახელობის თბილისის სახელმწიფო უნივერსიტეტის სტუდენტები, სერვისის მომხმარებელთა ოჯახის წევრები და დაწესებულების თანამშრომლები. მოხსენება, მოცემულ თემაზე, წაიკითხა ამავე დაწესებულების სოციალური რეაბილიტაციის განყოფილების უფროსმა - ქალბატონმა ლალი წულეისკირმა. განხილულ იქნა ისეთი საკითხები, როგორიცაა: რეფორმა ფსიქიატრიაში, დეინსტიტუციონალიზაცია, ფსიქოსოციალური რეაბილიტაცია და მისი მნიშვნელობა ფსიქიკური აშლილობის მქონე პირების საზოგადოებაში ინტეგრაციისთვის. მოხსენება დასრულდა აღნიშნულ თემებზე ღია დისკუსიით, რომელშიც აქტიური მონაწილეობა მიიღო დამსწრე საზოგადოებამ.

ღია კარის დღე თემაზე - "მარიხუანა და მისი მოხმარების შედეგები" 2015-10-23 12:07:47

2015 წლის 23 ოქტომბერს ფსიქიკური ჯანმრთელობის და ნარკომანიის პრევენციის ცენტრში ჩატარდა მორიგი ღია კარის დღე თემაზე - „მარიხუანა და მისი მოხმარების შედეგები“.
შეხვედრას ესწრებოდნენ სტუდენტები, მასმედიის წარმომადგენლები, ცენტრის თანამშრომლები.

ღია კარის დღე თემაზე - "სუიციდი და საზოგადოება" 2015-07-23 12:05:59

2015 წლის 23 ივლისს, "ფსიქიკური ჯანმრთელობის და ნარკომანიის პრევენციის ცენტრში" ჩატარდა მორიგი ღია კარის დღე თემაზე - „ სუიციდი და საზოგადოება“.
შეხვედრას ესწრებოდნენ ივანე ჯავახიშვილის სახელობის თბილისის სახელმწიფო უნივერსიტეტის სტუდენტები, მასმედიის წარმომადგენლები, საქართველოს განათლებისა და მეცნიერების სამინისტროს, სსიპ „ლევან სამხარაულის სახელობის სასამართლო ექსპერტიზის ეროვნული ბიუროს“ წარმომადგენლები, ცენტრის სამეცნიერო საბჭოს წევრები, ფსიქოლოგები, ფსიქიატრები და ნარკოლოგები.
თემის მიმართ შეხვედრაზე გამოიხატა მაღალი საზოგადოებრივი ინტერესი და გადაწყდა, რომ უახლოეს მომავალში ფსიქიკური ჯანმრთელობის და ნარკომანიის პრევენციის ცენტრი დაგეგმავს ტრენინგს მედიისთვის.